పదర పదర పదరా (మహర్షి)

కవనం:  శ్రీమణి
చిత్రం: మహర్షి
గానం: శంకర్ మహదేవన్
సంగీతం: గొర్తి దేవీశ్రీ ప్రసాద్
సంవత్సరం: 2019

---

భళ్ళుమంటు నింగి వళ్ళు విరిగెను గడ్డిపరకతోన
ఎడారి కళ్ళు తెరుచుకున్న వేళన చినుకుపూలవాన
సముద్రమెంత దాహమేస్తె వెతికెను ఊటబావినే
శిరస్సువంచి శిఖరమంచు ముద్దిడె మట్టినేలనే

పదర పదర పదరా నీ అడుగుకి పదునుపెట్టి పదరా
ఈ అడవిని చదును చెయ్యి మరి వెతుకుతున్న సిరి దొరుకుతుంది కదరా
పదర పదర పదరా ఈ పుడమిని అడిగిచూడు పదరా
ఈ గెలుపను మలుపు ఎక్కడను ప్రశ్నలన్నిటికి సమాధానమిదిరా

నీ కథ ఇదిరా నీ మొదలిదిరా ఈ పథమున మొదటడుగెయ్ రా
నీ తరమిదిరా అనితరమిదిరా అని చాటెయ్ రా

కదిలే ఈ కాలం తన రగిలే ఈ వేదనకి
బదులల్లే విసిరిన ఆశల బాణం నువ్వేరా
పగిలే ఇల హృదయం తన యెదలో రోదనకి
వరమల్లే దొరికిన ఆఖరి సాయం నువ్వేరా

కనురెప్పలలో తడి ఎందుకని తననడిగే వాడే లేక
విలపించేటి ఈ భూమి ఒడి చిగురించేలా
పదర పదర పదరా ఈ హలమును భుజముకెత్తి పదరా
ఈ నేలను ఎదకు హత్తుకుని మొలకలెత్తమని పిలుపునిచ్చి పదరా
పదర పదర పదరా ఈ వెలుగను పలుగు దించి పదరా
పగుళ్లతో పనికిరానిదను బ్రతుకు భూములిక మెతుకులిచ్చు కదరా

నీలో ఈ చలనం మరి కాదా సంచలనం
చినుకల్లే మొదలై ఉప్పెన కాదా ఈ కథనం
నీలో ఈ జడికి చెలరేగే అలజడికి
గెలుపల్లే మొదలై చరితగ మారే నీ పయనం

నీ ఆశయమే తమ ఆశ అని తమ కోసమని తెలిశాక
నువు లక్ష్యమని తమ రక్షవని నినదించేలా
పదర పదర పదరా నీ గతముకు కొత్త జననమిదిరా
నీ ఎత్తుకు తగిన లోతు ఇది తొలి పునాది గది తలుపు తెరిచి పదరా

పదర పదర పదరా ప్రతొక్కరి కథవు నువ్వు కదరా
నీ ఒరవడి భవిత కలల ఒడి బ్రతుకు సాధ్యపడు సాగుబడికి బడిరా

తనని తాను తెలుసుకున్న హలముకు పొలముతో ప్రయాణం
తనలోని ఋషిని వెలికితీయు మనిషికి లేదు ఏ ప్రమాణం
ఉషస్సు ఎంత ఊపిరిచ్చి పెంచిన కాంతిచుక్కవో
తరాల వెలితి వెతికి తీర్చవచ్చిన వెలుగురేఖవో

---

విశ్లేషణ

ఒరవడి = ఆదర్శము, విద్యార్థులు చూచివ్రాయుటకై గురువులు వ్రాసిన మేలుబంతి
ఉషస్సు = వేకువజాము, the dawn 

---